但可惜影得唔好，連五官都睇唔清，我唯有放過佢啦! 準備轉身走嘅時侯俾佢發覺咗我影佢相，佢就一手拉住我唔放，扮哂受害者同用懶係斯文嘅口吻問:「妳做咩影我相呀?」我冇理佢，fing 開佢隻手之後繼續行。點知佢就開始發癲...
佢好大力咁捉住我兩隻手，死都唔放，仲不停喺度問我做咩影佢相，叫我即刻delete咗佢...
我:「邊個叫妳頭先撞我呀! 放手呀!」
癲雞:「喂! 係妳上車撞到我唔講對唔住先ga! 妳快啲delete張相呀...」
我:「我上車根本就冇撞到妳，係妳落車嗰陣撞咗我兩下! 妳即刻放手啦吓!!」
(跟住我又 fing 開佢隻手，但佢又捉番住我。)
癲雞:「喂! 妳好快啲delete張相啦喎... 」 (仍然係用楚楚可憐博同情嘅口吻講!)
我:「放手呀!」
癲雞:「咁妳做咩影我相吖? 係妳撞到我冇講對唔住先ga喎...」
我:「我冇撞到妳! 妳即刻放手呀! 妳頭先撞得我好過癮ga!」
癲雞:「妳 de 唔 delete 呀? 好吖，咁我報警! 我要告妳侵犯我私隱!」
(我哋側邊有一個報案室，佢就捉實我兩隻手，夾硬扯我埋去...)
我:「我唔得閒同妳癲呀! 妳都黐線ga!! 放手呀!!」
就係咁，我同隻癲雞就响報案室嘅附近拉拉扯扯咗成十分鐘! 最火滾係，案發嘅地點係大部份上班一族必經嘅地方，人流極之高! 死唔死吖! 我迫住要同隻癲雞喺度做馬騮戲! 其他人唔知，仲以為係大婆同二奶喺度爭老公! 我實在忍無可忍..
我:「報警吖嘛? 報啦! 報啦! 報飽佢!」
跟住我就同隻癲雞行埋去嗰個報案室門口，佢就按動牆上嘅電掣. 喺呢一刻佢終於都放開我對手! 但我冇走咗去，我條心諗:「好! 我就同妳癲!」
癲雞:(扮哂鎮定同好得戚咁) 「哼! 妳千祈唔好 delete 張相呀! 我要告妳侵犯私隱呀!」
企咗分幾兩分鐘，但透過玻璃門望入去，仍然唔見有警察出嚟... 於是我用手敲度玻璃門，都係冇人應門...可能啲警察喺閉路電視睇到有兩個女子，多數都係濕滯嘢而唔敢應門，希望隔一陣我哋會自己走。癲雞見我敲門，佢又學我敲門，敲咗幾吓終於有個三十幾歲嘅警察行出嚟...
警察A:「妳哋咩事ga?」
(度門只開咗四分一，好明顯個警察唔係好想招呼我哋!) 但隻癲雞已經 "zip" 咗入去，所以我都跟埋入去。
癲雞:「我哋嚟報案ga...呢個女人(指住我)撞我又影我相呀!」
(佢已經好唔客氣咁行咗入去坐低咗，個警察攔都攔唔切。)
警察A:(望吓我同隻癲雞) 「咪住，咪住...妳哋究竟咩事先... (警察A被迫要跟住隻癲雞返埋位) 邊個要報案?」
癲雞:「阿sir，我要打個電話...呢個電話係咪可以用? 」(準備攞起枱上面個電話)
警察A:「咪住...妳想打俾邊個?」
癲雞:(好似鵪鶉咁震住講) 打俾我老公同打返公司...」
警察A又呌啖氣擰哂頭，做手勢叫佢:「打啦! 打啦!」
跟住隻癲雞就打俾佢老公，同佢講話自己依家喺報案室，又話甚麼甚麼被個女人撞又影佢相...警察A等佢打完電話再問:「邊個要報警呀?」
(隻癲雞窒咗一窒唔出聲)
唔知係唔係我心理作用，覺得隻癲雞有啲怯... 我見隻癲雞咁，就答個警察。
我:(我沒好氣地擰擰頭)「 唔係我話要報警呀! (伸手引導個警察望去隻癲雞度) 係佢話要報警呀!」
癲雞:(被迫出聲，仍然喺度扮斯文) 「我要報案呀，我要告佢侵犯我私隱! 阿sir! 呢個女人撞到我又唔講對唔住呀...(扮成受害人咁款!)」
我真係好頂佢唔順，成個幼稚園學生咁，好幼稚同低B! 佢簡直就係喺度嘥緊納稅人嘅錢同浪費警力!
我:「我冇撞妳，係妳撞我啫!」
我伸隻右手出嚟俾阿sir睇:「我隻手俾佢整到紅哂呀!」
隻癲雞又伸佢隻手出嚟，示意佢都整親!
癲雞:「妳影咗我相喎! (擰返去同警察A講) 頭先上車撞到我都冇講對唔住呀!」
警察A:「咩相呀?」
(我就俾嗰張影到唔淸唔楚嘅相阿sir睇)
警察A:(呌咗啖氣，跟住擰向癲雞沒好氣地講。) 「嗱，小姐，首先呢，呢位小姐影妳相呢，係冇侵犯妳私隱ga...除非佢影妳啲重要部位同埋有不雅成份啦...」
(癲雞搶住講...)
癲雞:「喂， 我點知佢係咩人嚟呀! 我點知佢影我張相有咩用途呀!」 (我心諗:我真係唔知妳係咩人至真呀!)
警察A:(有啲唔耐煩...) 「即係好似啲明星成日被人影咗相咁之嘛! 冇得告人哋ga! 人哋根本冇侵犯佢私隱! 所以都由得人哋影ga!」
癲雞死唔罷休...
警察A:(擰哂頭同隻癲雞講) 「小姐，唔該身份證吖! (攞咗本記事簿出嚟，抄低佢ID no.) 唔該mark低妳地址...」
我:(問警察A) 「我駛唔駛俾身份證你?」
警察A:「妳都要。」
喺癲雞寫緊地址嗰陣，警察A用對講機 call 咗第二個警察過嚟報案室...
警察A:(継續應酬隻癲雞) 「嗱，我明白返工時間人多，碰撞就少不免ga嘞，大家遷就吓...」
癲雞:「咁佢仲影埋我相喎! 我叫佢delete佢又唔delete!」
好快警察B就入到嚟，佢應該四十歲度...
警察A開始有啲扯火:「嗱如果再係咁落去呢， 我唯有兩個「的」哂返察館嘞!」
我示意兩位警察去問隻癲雞。 隻癲雞可能知道玩大咗，但又落唔到台，唯有夾硬講:「返囉...」
警察A見形狀，簡直冇哂符，就同警察B企埋一邊傾咗陣，跟住警察A示意我跟佢入去間房度，而警察B就去招呼隻癲雞。我諗佢哋一方面係想隔開我哋，另一方面係想睇下我哋邊個講緊大話!
一入到房，警察A又擰哂頭...示意我坐低:「小姐，唔該講講妳地址...」
抄完我地址之後，警察A好無奈同我講:「不如妳delete咗張相啦...就咁算啦...」
我:(仲係好嬲)「我唔會 delete 張相ga，(又俾張相佢睇) 你話張相睇到啲咩吖!」
警察A無奈出咗房，到警察B入嚟。
警察B:(好平淡) 「妳講吓發生咩事。」
於是我就由轉車開始講起，一五一十咁將所有細節講哂出嚟。當講到到咗總站隻癲雞攔住我，唔俾我落車嘅時侯...
警察B:
「咁...佢都要落車ga?」
我:「講得啱呀! 但我完全感覺唔到佢有意識要落車囉! (跟住我継續示範佢點樣撞我..點解我要影佢相...) 根本我就冇撞到佢，係佢好大力咁撞咗我兩下呀! 所以我影佢相囉! (我指住我隻手錶) 老實講吖，宜家呢個鐘數係返工時間，喺固定時間，固定嘅車廂，有固定嘅一班人ga，朝朝早都係嗰班人ga嘞，你如果要問人發生咩事，一定問到，唔難ga!」
警察B: 「佢點攔住妳? (跟住佢企咗起身，示意同我案件重現。)」
示範完之後我坐番低...
我: 「張相我就唔會delete ga 嘞，(我又開張相俾警察B睇) 你話張相睇到啲咩嘢! 佢都黐線ga，嘥我啲時間, 兩個人就喺出面做馬騮戲!」
警察B:「喺邊度?」
我:「就呢度出面囉!」
警察B點下頭，然後出咗房。我隱約聽到有人响出面講: 「咁妳唔可以攔住人唔俾人落車喎!...」隔咗一陣，又到警察A入返房。
警察A: (面容扭曲，好沮喪)「 阿...小姐呀...妳...我...斟杯水俾妳先...嗯...暖水啦...(用紙杯裝咗杯水俾我) 冷靜啲...」
我:「我好冷靜喎! 妳叫佢(隻癲雞)冷靜啲仲好啦!」
警察A:(一臉沮喪) 「咁啦...小姐...妳不如delete張相佢啦! 好冇呀?」
我:「我唔會delete張相ga嘞! 宜家係我俾佢撞呀! 得! 除非你叫佢同我道歉啦!」
警察A坐咗喺我面前，不知所措...
我見佢俾隻癲雞玩到陀陀擰
，都好陰公! 我都覺得唔可以再咁樣落去，隻癲雞自己發花癲好嘞! 唔好再嘥我寶貴嘅時間...於是我就同警察A講...
我:「delete張相呀嘛? de- 啦 de- 啦!」 (好唔願意地遞咗部手機俾佢)
警察A見狀，即刻喜上眉梢，接過我部手機，仲好搞笑咁問:「妳部機咁新，我唔識用喎... (跟住佢攞咗我部機出去揾隻癲雞。我亦跟埋出去，因為我驚佢俾咗我部機隻癲雞。)
警察A:(行埋去隻癲雞度) 「嗱嗱嗱，依家delete張相嘞! 咁得啦!」 (不過唔係好識點delete，於是我攞番部機自己delete。)
我:(準備delete張相嘅同時，對住隻癲雞講) 「我呢...真係咁大個人呢...今時今日俾我撞到妳呢個瘟神呀...我當黑，我倒霉呀!」
隻癲雞坐喺度唔敢出聲...我delete完張相後，即刻問兩位警察先生:「咁我宜家走得未?」
警察A:「妳可以走啦...(跟住擰去同隻癲雞講) 咁...小姐，唔該妳喺度(指本記事簿)簽番個名!」
癲雞:(好唔憤氣) 「點解要簽名呀? 咁...我啲地址同...落咗簿呀?」
警察A:「係!」
癲雞:(喺度發脾四) 「我唔會簽ga!
」
(我心諗:妳係唔係黐線ga，係妳話要報案吖嘛! 咁梗係落咗簿啦! 妳估細路仔玩泥沙呀!) 我唔得閒同隻癲雞糾纏，即刻動身走人。
警察A:(即刻嗌住我) 「嗯...等陣呀小姐，我送妳出去。」
警察A一路行就一路呌大氣同擰頭，自言自語:「唉 ~ 真係...(擰轉頭問我) 頭先係幾點鐘(指案發時間)...」
我:「大概...九點鐘度...」
警察A攞本記事簿出嚟mark低。佢送到我去電梯口:「小姐，唔該哂，唔該哂!」
我:「唔該哂!」
跟住我就急急腳行返公司，返到公司坐低望吓隻手錶，已經係九點五十分! 仲留意到隻左手俾隻癲雞揑到又紅又瘀又腫呀! 你話有冇天理吖! 
