公司都未返到，就去咗報案中心，仲要同個癲嘅八婆一齊去! 呢件極之荒謬嘅事係咁嘅...

話說今朝搭港鐵返工，一如以往，要中途轉車。車門一開，先讓路給落車乘客已是指定動作，然後我例必盡量行入車廂中間，因我極之討厭企近車門而被迫做沙甸魚。當我行入車廂兩邊嘅中間位置後，卻發覺有一位揹住個LV袋三十幾歲嘅女子手握住扶手鐵，企得甚"nga jar"。佢身形就似「肥咗同埋冇咁醜樣」版本嘅馬蹄露咁款!  睇見佢咁我已經响心度媽媽XX，因我真係好唔鍾意呢種咁自私嘅人呀!  都算嘞!  我唯有就企响佢旁邊，不過我握住扶手鐵嗰隻手就掂住佢隻前臂。跟住落嚟就有嘢發生嘞!  我感覺到佢刻意同我鬥力，但我冇理佢，亦冇反擊同出聲。隔咗一陣，佢就推咗我一吓，然後企開咗少少，不過佢就一路都住我，我仲瞄到佢對住我陰陰嘴笑...

終於到咗總站要落車，但响車門同月台嗰度門都開咗後，其他嘅乘客都落緊車嘅時候，嗰個女人隻手仍然冇離開過嗰條扶手鐵，仲係响我胸前攔住。 個個都落緊車啦，我梗係要動身落車啦! 於是我就用我嘅上半身試圖推開佢隻手，點知佢就死揸住條扶手鐵唔肯放，嗰一刻我就確定呢個人係有敵意嘅。我都未嚟得切防範，佢就用佢嗰隻揸住扶手鐵嘅手用力將我撥到三百六十度轉!  當佢順時鐘方向轉到去我八點鐘嘅位置嗰陣，佢好大力咁撞咗我兩下! (大家留意我係用個「撞」字而唔係個「碰」字) 個女人應該有百二磅度，而我就得一百磅樓下，我梗係要紮起個馬先至企得穩啦! 佢仲施施然响出咗車門之後擰返轉頭對住我恥笑咗一下!   真係火都嚟埋!  終於我都開聲閙佢:「妳黐線ga ! 有病睇醫生啦! 小姐!」 由於我已經遲到，所以我冇再理佢，急急腳行快步，上電梯同出閘，跟住再上多條長電梯，但就响中途停低稍作休息。

正當我响度諗緊點解會有啲咁衰嘅人嘅時候，佢竟然喺我側邊出現，仲專登"zip"咗响我前面!  嗰一刻我喺度諗:「有冇搞錯呀! 吊住我尾! 冇咁啱妳又係行呢邊啩!」  點知一上到電梯頂，佢竟然轉左，仲不断望番轉頭! 咁我就好肯定佢係吊住我尾!  因為嗰個鐘数絕大部份人都會向右轉，甚少人會向左轉。 於是乎我就攞部手機出嚟，等佢又擰轉頭嗰陣影低佢個樣，但可惜影得唔好，連五官都睇唔清，我唯有放過佢啦! 準備轉身走嘅時侯俾佢發覺咗我影佢相，佢就一手拉住我唔放，扮哂受害者同用懶係斯文嘅口吻問:「妳做咩影我相呀?」 我冇理佢，fing開佢隻手之後繼續行。點知佢就開始發癲...