無喇喇接到我第一個tag, 都仲未知做乜, 不過都好驚喜呀! 好多謝blog友水十十月.
前排比較忙, 個人好懶, 依家就拿拿淋接"蕉". 由於我認識嘅blog友唔多, 所以都打算等有緣人入嚟自己答.
回答所有問題，並發一篇Blog在自己的網誌上！回答之前，請刪除一條你不喜歡的問題，另出一條問題代替；完成後，再點人繼續遊戲，並到這些人的Blog留言通知對方
1) 你自己最大的缺點？
- 同水十十月啱啱相反, 我做嘢太專心, 有好多時都做到唔曉停嗰下嘢死吖嘛!
- 有啲人話過我個腦轉得都算快喎, 所以有時講完嘢, 人哋要諗吓點解我會咁講, 因為我好多時都會由第一句跳去第三句喎! 人哋話嘅!
- 我都算係臨急抱佛腳嘅人! 硬係要拖到無可再拖嗰陣先至去做...(估唔到我同blog友水十十月都幾似喎!!)
2）你最鍾意什麼活動／運動？
)
運動：游水(細個嗰陣勁鍾意, 不過依家都鍾意, 但已經好耐冇游咯!), 打羽毛球, 打排球, 打籃球,...基本上好多運動我都會玩, 只不過唔係好精啫!
3）到目前為止，什麼令你最難忘？
第一個响外國過嘅平安夜...記得平安夜前排嘅天氣真係好凍, 不過重未落冬天嘅第一場雪, 當晚冇乜風, 我一個人行出街食飯, 發覺成條街一個人都冇, 連車都冇, 好鬼靜! 可能唔係大城市啦! 但行咗幾步路就開始落起毛毛雪嚟. 啲雪响淡黃色嘅街燈映照下就好似响天上面洒落嚟嘅砂糖咁, 閃閃"ling", 唔駛一陣間, 成條馬路都鋪上一層薄薄嘅雪, 我見到咁嘅場面簡直就呆咗, 因為真係好靚好靚好...靚呀!
不過當時嘅心情相當複雜...因為對於冇男朋友嘅我嚟講, 忽然間覺得好寂寞...
嗰一刻我先至完完全全明白咩嘢叫做淒涼!
4）你曾經被多少人暗戀？
曖曖昧昧嘅...我諗都有...三個...雖然話係暗戀啫，但你都會feel到嘛!
５）如果時間可以停止一分鐘，你希望停留在哪一刻？
我諗我想番去同"佢"响車度嗰一刻...
６）如果你走到人生的盡頭了，那在你人生最後的一段歲月，你會做什麼？
同我最愛同關心嘅人响一齊, 見多啲面!
7）假如有一國家即時批准你擁有永久居留權，你想去邊個國家住？
都係最鍾意香港呢! 外國嘅生活雖然冇咁緊張, 但我始終鍾意香港夠多姿多采!
8) 人生最快樂既一件事？
8) 這一刻最想做的事？
希望快啲搵到錢買樓, 等自己同屋企人可以住得舒服啲!
9) 最令你遺憾的一件事？
未有多抽時間關心爸爸!
10) 如果你可以選擇叮噹其中一件法寶，你會首選邊樣？
我都會揀隨意門啊! 可以穿梭時空, 到時我就可以做番啲冇機會做嘅嘢! 咁就唔會有咁多遺憾嘞!
11) 如果可以讓你做透明人半小時，你會做什麼？
我會留喺唔鍾意我嘅人身邊.
12) 你細個時第一個印象係幾歲?做緊乜?
真係問得好...我諗應該係三歲半啩! 嗰次俾坐响隔離嘅同學仔陷害, 搞到我俾miss打手仔同埋罰企!
嗰次仲係我人生以來第一次俾人罰添!
